Dejgång A wa knæjt !

Nøj om dejgång A wa knæjt - da wa dæ knæjt te !

Krønike

 

NØJ OM DENGÅNG A WA KNÆJT !

 

Dejgång va dæ knæjt te !

Å så væl a prøv å fåtæl po mit føst språg: himmerlandsk! De' hier åsse kimbrisk. De' æ 27 oer si'n A sist hå snakked rajti himmerlandsk. De' snakked' A åltije mæ min mor. Mæn ættæ hun døed i 1993, hå A* hatt anne å snak mæ på mit in sprog. No må vi så sij, om do ka forsto nøj o'ed!

Vi bo'e po en æjendom mæ manne fåskelli dyer.  Kyer, kall, hæjst, griis, høns, kalkuner, duer - å en masse katt. Vi håd åsse en stur kåk. Han vil ræn etter mæ. Nok mjæst få sjåv. Men A va no litt bång få ham. Han ku rænn stærk. Men A ku rænn stærkere.  Vi bløv ræt go'e vænner te sist.  A bløv i hvær fal møj ki o'et, da han en awten bløv ætt o rævven :-(

A hå kun fått en luusning å mi far jen gång. Det fik A, fådi A håd slån min bettebror i mawen mæ min knytnæv. A må ha slån håt. Få han bløw hiel hwi i hoede - å kåst op. Te sist falt han om i høed, huer vi var. A kallt po mi far. Å da han kom å so, hva dæ va skæj, fik A en luusning, så A både ku si både stjærner å måner !  Da wa hun li ve å mist tow dræng po jæn gång! Mæn vi kåm da te hæjtern bejje tow ijen. Sekke nøj!

Da a bløw syv oer, sku a begynn i skoel. Det glæje a mæ ræjti møj te. A ku gåt løøs, før a kåm i skoel. Mæn dæ wa så møj ånt, a gjarn vil læær. Den daw a sku begynn, de' var den 2. april 1952. Soelen skinned.  Tit så tåd børnen jen å djæ forældr mæ dæn føst daw. Men næj tak. De' sku' a nok sjæl klår. Så A rennt hiele væjen nier te skoelen. De' var two kilometer. Men heldivis var'ed nier-o' hiele væjen.  Po væjen rennt a fobi noen å de anne knæjte, dæ sku' begøn i skuelen den daw.

Min bæjst liegkammerat i de oer va Leif. Ha va litt ynger æn mæ å bo'e litt længer hen po vå væj.  Vi håd en masse sjåv sammen. En gång sku han mæ mæ åp te min bæjsteforældr i Vændsyssel po ferie. Han sov ve wås om nætten, få vi sku no' ruttebilen møj tiile åm mårnen. Vi kåm åp, fik vå ud'n - å va på væj hæn te ruttebilen.  Plusselig opdawer Leif, at han håd glæmt å ta bowser po. Så måt vi ta bienen po naggen få å hint dem.  Vi noed de hiele!

Å såen ku A blyww ve!!

 

 

Niels Jørgen Thøgersen

 

August 2021